
Giaghat ni National Bureau of Investigation (NBI) Director Melvin Matibag ang kampo ni Vice President Sara Duterte nga magpasaka og pormal nga reklamo bahin sa matud pa pagpanghulga ug pagpamugos sa pagpapirma sa kanhi household staff sa Bise Presidente.
Gipagawas ni Matibag ang maong pahayag human gibutyag sa tigpamaba ni Duterte nga si Atty. Paolo Panelo nga nakadawat matud pa ang Bise Presidente og mensahe gikan sa kaniadtong katabang niini nga nangayo og tabang ug nagpaluwas sa Manila.
Matud ni Panelo, nadawat ang mensahe mga alas 11:19 sa gabii niadtong Lunes, Nobyembre 16, diin gipadayag niini nga anaa sa kustodiya o kontrol sa pipila ka indibidwal ang kanhi staff, gihulga ang kinabuhi niini ug gipugos sa pagpirma sa usa ka dokumento nga gibalibaran niini.
Samtang, gipahayag ni Matibag nga angayang direktang midangop sa mga otoridad ang kampo ni Duterte kung dunay tinuod nga hulga ug gusto niining maimbestigahan ang insidente.
Gipamugos usab sa NBI chief nga hangtud walay tin-aw nga dokumento ug ebidensya nga makapamatuod sa mga alegasyon kay makonsiderar nga tsismis lamang kini ug gibutyag usab niya nga wala pay nadawat nga pormal nga reklamo ang ilang buhatan bahin niini. (raniel mahunyag)




