Gihagit ni Senate President Alan Peter Cayetano si National Bureau of Investigation (NBI) Director Melvin Matibag nga mutambong sa hearing sa Senate Blue Ribbon – Sub Committee aron makig-face-off sa 18 ka mga kanhi marines nga iyang gi-alegar nga mga binayran.
Miingon si Cayetano ga interesado siya masayran ug madungog, gikan mismo sa baba sa NBI Director o sa iyang mga ahente ang pasangil nga binayran ang ilang mga resource person.
Gusto ni Cayetano nga magpakita si Matibag kay sa naglabay nga mga sesyon, kalit man kini nagpakita bisan walay imbitasyon.
Hisayran nga sa press conference nga gilusad sa NBI dungan sa sesyon sa senado, miingon si Matibag nga nakadawat sila sa impormasyon nga giingong mga sinuhulan sa tag-₱5 milyon ang matag usa sa 18 ka ex-Marines aron motestigo.
Maoy gitumbok ni Matibag nga nanuhol si kanhi kongresista Mike Defensor.
Gumikan niini, laraw sa ahensya nga buksan subli ang imbestigasyon sa mga alegasyon sa kanhi marino nga mga security escorts ug tigdeliver sa mga maleta ni kanhi Ako Bicol Partylist Representative Zaldy Co.
Una niini, miingon si Matibag nga ang impormasyon nga iyang nahuptan mitumaw gikan sa usa ka paryente sa usa sa mga ex-Marines nga nakigkoordinar sa ahensya.
Ang NBI karon nagpadayon sa pag-beripika sa alegasyon ug laraw ipasubpoena sila kanhi kongresista Mike Defensor ug ang mga kanhi marino. Wala pa tubaga ni Matibag ang hagit kaniya ni SP Cayetano.
