Gipamugos ni National Bureau of Investigation (NBI) Director Atty. Melvin Matibag nga dili pamulitika ang operasyon sa NBI sa usa ka KTV bar ngadto sa Pasig City nga giingong konektado sa pamilya ni kanhi Kongresista Mike Defensor.
Matud pa ni Matibag nga gisunod sa NBI ang hustong proseso ug kabahin kini sa ilang mandato, ug dili pulitika ang hinungdan.
Gipadayag usab sa NBI nga nagpasaka na sila sa reklamo batok sa asawa ug anak ni Defensor ug uban pang indibidwal nga may kalabutan sa kaso sa human trafficking.
Ang reklamo naglakip sa paglapas sa Anti-Trafficking in Persons Act ug Comprehensive Dangerous Drug Act of 2002 nga gisumite sa Pasig City Prosecutor’s Office, samtang gipanghimakak usab ni Matibag ang pahayag ni Defensor nga wala na nag-operate ang maong bar sukad 2019, apan nakit-an kini nga adunay lease contract hangtod 2025 nga pirmado sa asawa niyang si Julie Defensor. (phillip ariata)
