CAGAYAN DE ORO CITY – Dili babagan apan tugtan sa regular board of directors ang case build up nga gihimo sa National Bureau of Investigation Manila ngadto sa unom ka opisyal sa Cagayan de Oro Water District o COWD nga gisugyot sa interim officials nga ipaubos sa imbestigasyon.
Kini human una nang nagduso’g reklamo si interim COWD General Manager Fermin Jarales sa maong mga opisyal tungod sa giingong mga kahiwian ug pagbabag sa ilang trabaho isip mga tinudlo sa Local Water Utility Administration o LWUA.
Miingon si regular COWD board of director Gerry Caño nga mismo na ang mga hingtungdang mga opisyal ang mohatag tubag sa gipangayong impormasyon sa NBI.
Una niini,nagkabangga ang duha ka puwersa sa regular ug interim sa COWD tungod sa LWUA takeover subay usab sa mando ni Pres Bongbong Marcos kabahin sa panubig sa dakbayan.
Samtang angay lang tahuron sa regular COWD management ang gilugwa nga mando sa LWUA nga pasudlan sa interim officials aron tubagon ang krisis sa panubig sa dakbayan.
Kini ang reaksyon ni Citizens Watch for Good Governance 10 convenor Atty Antonio Soriano kabahin sa unang pahayag sa regular COWD mngt nga tahuron ug respetuhan na nila ang LWUA takeover ilabina nga giila sa Office of the Government Corporate Counsel nga ensakto ang pagsulod niini sa water district sa syudad.
Namahayag si Soriano nga anaa sa ensaktong posisyon ang LWUA aron haw-ason sa grabeng suliran ang COWD nga sumala sa Commission on Audit findings adunay sobra 5 bilyones pesos nga alkanse sa ilang operasyon sa taas na nga katuigan.
