CAGAYAN DE ORO CITY – Ipatawag sa Kamarabaha ang kadagkuan sa NBI-Manila ug Commission on Human Rights aron tumbukon ang utok sa mga kaso sa red tagging ug harassments nga nasinatian sa pipila ka organizers sa trending nga community pantries sa nasud.
Kini human naduso ni Deputy House Speaker ug Cagayan de Oro 2nd District Rep Rufus Rodriguez ang resolusyon aron imbestigaran sa NBI ug CHR ang duha ka kaso sa harassment ug red tagging sa organizers sa pantries sa Brgy Kauswagan ug Halal Food pantry ning syudad ning semanaha lamang.
Miingon si Rodriguez nga obligahon nila ang NBI ug CHR nga ilhon ang utok sa maong pagpanabotahe aron makasuha’g kriminal sa husgado.
Samtang gihimakak sa liderato sa Cagayan de Oro City Police Office o COCPO nga duna sila’y mga pulis nga mihimo’g profiling o nang-red tag ngadto sa pipila ka organizers sa community pantries dinhi sa dakbayan.
Kini human unang gibutyag ni Rene Principe Jr sa Bombo Radyo nga nahunong ang ilang kalihukan kay nakadawat sila’g bahad sa kinabuhi ingon man ang tag-iya sa Babu Kwan Food Pantry nga si Khal Mabuay-Campong ning syudad.
Gibutyag ni COCPO Director Col Henry Dampal nga wala sila sukad mihimo niini ug may mando na kini nga makigkita kang Principe ug Campong aron imbestigaran ang tagsa-tagsa ka harassment nga nahitabo batok kanila.
