CAGAYAN DE ORO CITY – Gipasalig sa National Bureau of Investigation o NBI-10 nga may himoon sila nga lakang sa kamanduan ni Pres Rodrigo Duterte nga pasirad-an ang operasyon sa Kabus Padatoon o KAPA Community Ministry International Incorporated ni Pastor Joel Apolinario.
Si NBI-10 regional director Atty Patricio Bernales Jr miingon nga sundon nila ang mando ni Duterte batok KAPA.
Apan namahayag si Bernales nga dili mag-agad ra sila sa NBI -Manila sa angay nila buhaton.
Samtang hugot nga koordinasyon ang himoon sa Criminal Investigation and Detection Group o CIDG-10 ngadto na sa National Bureau of Investigation 10,Securities of Exchange and Commission -10 ug local government units sa kamanduan ni Presidente Rodrigo Duterte nga pasirad-an ang operasyon sa KAPA ni Pastor Joel Apolinario.
Gibutyag ni CIDG-10 regional director Police Lt Col Reymund Liguden nga may mga konkretong lakang na silang gihimo batok sa KAPA ilabina nga ila nang gisugdan ang case build up batok sa maong organisasyon.
Una nang gitawag ni Pres Rodrigo Duterte nga syndicated estafa ang gihimo sa KAPA nga angayan nang mahunong.
Samtang gipasalig sa Police Regional Office o PRO-10 nga gilayon nilang ipatuman ang kamanduan ni Duterte nga pasirad-an ang operasyon sa KAPA kon ugaling makadawat na sila’g court order.
Sumala ni PRO-10 spokesperson Police Lt Col Surki Serenias nga kinahanglang aduna sila’y papel nga pagahuptan sa ilang himoon nga operasyon aron dili mabutang sa peligro ang ilang trabaho.
Dugang pa niini nga andam sila nga makigkoordinar sa NBI-10 ug CIDG-10 nga maoy gitahasan ni Pres Duterte nga mangulo sa pagdakop ug pag-imbestigar sa operasyon sa KAPA.
Una nang miggawas ang report nga adunay pipila ka mga pulis ang giingong miembro sa KAPA.
Samtang gisalig na lamang sa komitiba sa trade and commerce sa konseho sa NBI ug CIDG ang pag-imbestigar sa mga nag-operate sa KAPA ni Apolinario dinhi sa syudad.
Kini human giangkon ni Kagawad George Goking,chairman sa maong komitiba nga nakasulod na sa dakbayan ang maong klase sa pagpanapi.
Si Goking miingon nga walay mahimo ang konseho sa syudad sa pagpugong sa maong illegal nga kalihukan apan mapasalamaton kini tungod kay mismo si Duterte na ang nagmando nga pasirad-an ang KAPA.
Asoy ni Goking nga galisod ang NBI ug CIDG sa pagsikop sa mga nag-operate sa KAPA tungod kay walay kaso nga gipasaka batok kanila.
