CAGAYAN DE ORO CITY-Gikompirmar sa Security and Exchange Commission o SEC-10 nga andam na ang National Bureau of Investigation o NBI-10 pagduso’g kasong kriminal batok sa naglangkob sa Freeman Traders Club o FTC ning syudad.
Kini human han-ay na ang mga dokumento nga gamiton sa NBI isip pagsuporta sa investors nga mi-reklamo batok sa grupo ni FTC founder Mark Steven Freeman.
Miingon si SEC regional director Reynato Egypto nga lagmit nga kasong estafa ang ipasaka sa NBI sa piskalya batok sa mga sakop ni Freeman.
Una niini,mipatala sa kapolisan ang investor nga si Peter Lou Nunyeza tungod sa kapakyasan ni Freema mahatag ang 20 percent interest sa ilang investment.
Nabulgar nga walay permit nga nag-operate si Freeman sa iyang online investment gamit ang plotous coins ning syudad.
Samtang giputol na ni Atty Ramil Acol ang iyang relasyon ngadto sa kontrobersyal nga negosyanteng si Mark Freeman, ang founder sa Freeman Traders Club.
Sa interbyu sa Bombo Radyo kang Acol, siya mismo mihangyo nga dili na mokomento kalabot kang Freeman tungod kay nahuman na ang iyang pangabogado kaniya.
Gawas niini, gi-angkon usab ni Acol nga nakuha na niya ang iyang kwarta nga gi-invest kang Freeman.
Gihimakak usab ni Acol nga duna pa siyag linya sa komonikasyon batok sa nagtagu-tago nga negosyante.
Samtang wala na makurat si Atty Enrique Malicay sa nagsaka nga ihap sa mga nagreklamo sa korte batok kang Freeman.
Matud ni Malicay, kinsa kauban ni Acol nga nagsilbing legal counsel ni Freeman, nga dugay ra siya wala hinabi-a sa nasampit nga negosyante.
Gi-angkon ni Malicay nga wala na usab siya’y laraw nga mahibaw-an kung asa na si Freeman.
Hinoon, wala mitubag si Atty Malicay kung andam pa ba siyang mutindog isip legal counsel ni Freeman oras nga ipatawag kini subli samga otoridad ubos sa ilusad nga pagdungog sa konseho o sa korte.
Una niini,sayod si Malicay nga dunay mga pulis ug sundalo nga hangtud karon wala pa mauli ni Freeman ang ilang return of investment.
