Gipadayag ni Jaime Aguilar, spokesperson sa NCTU, nga positibo gihapon sila nga masulbad ang problema nga dala sa oil deregulation law pinaagi sa paggamit sa bag-ong teknolohiya nga dili na magsalig sa gasolina.
Sumala niya, kinahanglan suportahan sa gobyerno ang pag-manufacture sa mga de-kuryente o de-battery nga sakyanan pinaagi sa dugang insentibo aron mapakunhod ang gasto ug mapalapad ang paggamit niini.
Sa iyang panayam sa Bombo Radyo, gipasabot ni Aguilar nga anaa na karon ang modernong teknolohiya sama sa electric vehicles nga kaya mobiyahe hangtod 200 kilometros matag charge ug adunay fast charging system nga mas episyente.
Dugang pa niya nga kung mapalambo ug suportahan kini pinaagi sa solar-powered charging stations, mahimo kini nga long-term nga solusyon batok sa pagsaka sa presyo sa petrolyo.
Busa, gituohan sa ilang grupo nga pinaagi sa pag-shift sa renewable ug electric nga transportasyon, mahimo nga malikayan sa nasud ang epekto sa krisis sa lana ug mapalig-on ang kita sa mga transport workers.(By James Oliver)
