CAGAYAN DE ORO CITY- Problema sa pamilya ang gilantaw nga hinungdan sa kapulisan sa paghikog-patay sa usa ka negosyante diha sa 10th-21st Streets, Barangay Nazareth ning syudad.
Maoy naghikog ang biktima nga si Ricardo Cortez, 54-anyos ug residente sa maong dapit.
Matud ni PSInsp Julius Saluta, ang hepe sa Macasandig Police Station nga nagpusil sa iyang kaugalingon si Cortez gamit ang .45 kalibre nga armas.
Nanamilit na matud pa ang biktima sa iyang mga anak tungod kay dili na niya makaya ang gibating kamingaw sa iyang asawa nga namatay sa miaging tuig tungod sa sakit nga kanser.
Mohimo’g dugang imbestigasyon ang SOCO kalabot na sa kamatayon ni Cortez.
Matud ni Caballes nga ilang ipaubos sa ‘paraffin test’ ang biktima sa pagseguro nga walay foul play sa kamatayon niini.
Nakaangkon ang biktima sa samad-pinusilan sa iyang dughan nga maoy hinungdan sa iyang kamatayon.
Narekober sa crime scene ang usa ka .45 kalibre nga armas, usa ka empty shell, ug upat ka mga buhing bala.
