CAGAYAN DE ORO CITY – Kasuhan sa kapolisan ning adlawa sa estafa ug swindling ang duha ka tawo nga giingong nangilad sa dakong negosyante nga nakabase ning syudad.
Giila ni Carmen Police Station commander Maj Mario Mantala Jr ang biktima nga si Julie Ann Cassion,34 anyos,minyo nga nagpuyo sa Grand Europa,Brgy Lumbia ning syudad.
Gibutyag ni Mantala nga namaligya sa tituladong yuta ang mga dinakpan nga sila si Leonora Artajo nga taga-Brgy Kimaya,Jasaan ning lalawigan ug Nelson Villanueva nga residente sa Brgy Camaman-an ning syudad ngadto sa biktima diha sa lungsod sa Opol sa kantidad 1.5 milyones pesos.
Apan mismo nasuta sa biktima nga dunay laing tag-iya ang maong yuta hinungdang gusto niini kuhao’g balik ang nabayad nga salapi pero nagdumili na pag-uli ang mga suspetsado.
Gi-partida sa mga dinakpan nga dugangan na lamang sa laing 1.8 milyon pesos ang bayad aron mahatag na ang giingong kumpleto nga papeles hinungdang gikasa ang entrapment operation sa usa ka kan-anan sa Corrales Avenue hinungdan sa ilang pagka-sikop kagahapon sa hapon.
Una nang nabawi ang unom ka bundles sa peke nga salapi,mga dokumento ug ubang ebedensiya gikan sa mga dinakpan.
