CAGAYAN DE ORO CITY – Gikompirmar sa Misamis Oriental Provincial Jail o MOPJ nga nakapyansa ug temporaryong nakaggawas si Ralph Martin Rafanan Go,30-anyos nga taga Corrales Extension, Brgy 21 ning syudad.
Miingon si Provincial Jail Warden Dominador “Boy” Tagarda nga niadto pang July 23, 2018 nakaggawas sa bilangguan si Go pinaagi sa kamanduan ni Regional Trial Court Branch 44 Judge Marissa Estabaya.
Si Go ang naaresto sa PDEA-10 ug City Intelligence Unit sa PNP sa Laguindingan Airport tungod sa paghupot sa droga nga ecstasy niadtong Nobyembre 2017.
Si Go ang gikasuhan pagsupak sa section 5 sa Comprehensive Dangerous Drugs Act of 2002.
Samtang susihon sa PDEA-Misamis Oriental Team sa ilang legal department kon unsa ang basehan sa korte nga gitugtan makapiyansa ang dinakpan nga si Go nga unang detinado sa Misamis Oriental Provincial Jail.
Kini human angkona ni PDEA MisOr Team assistant leader Ken Cardona nga miduso’g motion to bail ang kampo ni Go alang sa iyang temporaryong kagawasan.
Miingon si Cardona nga mihuyang ang argumento sa prosekusyon gumikan sa pag-resign sa ilang kauban nga maoy midakop kang Go samtang dala ang 17 ka drogang ecstasy nga gikan sa kauluhan pag-abot sa Laguindingan Airport.
Gani,gusto nila nga ipaubos sa contempt of court ang maong ahente kinsa mi-resign sa trabaho ug wala na nagpakita sa ilang opisina sukad nakapasar isip abogado.
Dumduman nga ang maong akusado ang anak ni Brgy 21 chairman Gigi Go ning syudad.
