CAGAYAN DE ORO CITY – Gitahasan ni City Police Director Col. Salvador Radam ang ilang intelligence operatives sa pagsulbad sa duha ka magkalahing pagpamusil diin mikalas sa kinabuhi sa negosyante ug gikaangol sa maglive in partner ubos sa area of responsibility sa Bulua Police Station ning syudad.
Giila ni COCPO spokesperson Lt Col Evan Viñas ang namatay’ng biktima nga si Leonard Lacque,hingkod ang edad ug taga-lungsod sa Quezon,Bukidnon nga dunay gika-transaksyon sa produktong luy-a Brgy Bulua.
Saysay sa imbestigasyon nga nabaligya sa biktima ang produkto niini sa laing customer rason nga gikasuko sa iyang gikasabot hinungdan sa pagpamusil sa Zone 2,Lower Bulua kagahapon.
Samtang samaron usab ang live-in partner nga gisulaya’g kawat ang gisakyang motorsiklo sa tulisan sa Kinasanghan,Brgy Iponan.
Giila ang mga biktima nga si Arnel Entece nga taga-Opol ug Seguwen nga residente usab sa lungsod sa Medina ning lalawigan.
Saysay sa lending collector nga si Eric Piadeverde nga siya ang target sa armadong tulisan apan misukol kini hinungdan gipusil siya ug hinoon wala maigo.
Mosibat na unta ang suspek apan nakit-an niini ang live-in partners rason nga gisulaya’g ilog ang motorsiklo apan kay misukol usab si Entece rason nga gipusil sila ayha misibat sa wala matino nga direksyon.
