CAGAYAN DE ORO CITY-Ipasaka sa piskalya ang patung-patong nga kaso batok sa grupo sa negosyante nga si Douglas Galam diha sa piskalya sa syudad karong adlawa.
Kini human nakuhaa’g 30 gramos nga shabu ug halos nag-positibo sa paggamit sa droga ang mga suspek sa drugtest nga gipahigayon batok kanila sa PDEA-10.
Gibutyag ni PDEA agent Be Calibre nga gawas kang Galam,susamang kaso nga pagbaligya ug paggamit sa droga ang atubangon nila ni Atty Ben Johnson Pabelic;Richard Tejero;Derick Du ug kanhi dart player Alex Tagarao nga pulos mga residente sa syudad.
Una niini,gitawag nga ”magic” ni Galam ang nabawi sa PDEA nga shabu gikan sa iyang pinuy-anan.
Apan tubag ni Calibre nga palusot lamang ang gihimo ni Galam aron sila makalinggawas batok sa mga kaso nga ipasaka nga kanila sa piskalya ning adlawa.
Hisayrang si Galam ug Pabelic ang anaa na sa listahan sa PDEA ug Cagayan de Oro City Police Office o COCPO tungod sa giingong kalambigitan sa illegal drugs sa syudad.
