CAGAYAN DE ORO CITY – Naduso na ang P50 ngadto P60 million nga damage suit batok kang Camiguin Gov JJ Romualdo sa piskalya sa Sugbo.
Kini human akusahi si Romualdo nga mihimo’g pagpakaulaw sa Bahay Bakasyonan sa Camiguin o BBC nga giingong nagpataka’g labay sa ilang mga hugaw sa kadagatan sa isla ning tuiga.
Miingon ang abogado sa BBC nga si Atty Homer Mabale nga wala pa kini naglakip sa ipasaka nila nga kasong libelo gumikan gihapon sa giingong pagpakaulaw sa tigdumala sa maong establisimiento.
Nagsugod ang bangi tungod lamang sa paglike sa Facebook sa BBC co-owner nga si Marie Suzette Good sa post ni Atty Carlo Borromeo nga nakig-atbang pagka-mayor sa anak ni Romualdo sa miaging May 2019 elections.
Una niini,nag-atubang usab sa kasong Anti-Graft and Corrupt Practices Act ug Code of Conduct and Ethical Standards for Public officials and Grave Misconduct ang magtiayong Romualdo sa Ombudsman.
Dugtong niini,abli ang mga mikropono sa Bombo Radyo sa tanang higayon alang sa panig sa mga Romualdo kabahin sa maong isyu.
