CAGAYAN DE ORO CITY – Nadakpan sa Criminal Investigation and Detection Group kon CIDG-Misamis Oriental ang usa ka taxi driver nga naghupot sa ilegal nga armas ug mga shabu sa Balingasag Misamis Oriental, kaganina sa kadlawon.
Sa pakighinabi sa Bombo Radyo kang Police Lt. Noel Oclarit, giila nila ang suspek ang si Ferdinand Yamson Roa, hingkod ang edad ug residente sa Brgy San Isidro Balingasag.
Nakuha sa iyang posisyon ang usa ka submachine gun nga loaded sa 30 ka mga bala, ug dili matino nga ihap sa mga shabu.
Dugtong niini, namahayag si Oclarit nga nadakpan na nila kaniadto ang igsoon sa suspek sa tuig 2017 tungod sa pagpayuhot sa ilegal nga druga. Hisayran nga mismo si San Isidro Brgy. Chairman Jose Gabule ang nagpakitabang sa CIDG tungod sa ilang nasayran nga armado ang maong dinakpan ug miingon ang ilang testigos nga nagbaton kinig mga drugang shabu.
