CAGAYAN DE ORO CITY – Dili magkulang ang kaugalingong suplay sa bugas alang sa mga konsumante taliwala nga mopadala ang National Food Authority o NFA 10 ngadto sa katawhan sa Visayas region.
Kini human naumol ang kabalaka nga hayan mawad-an sa bastanteng NFA rice supply ang Northern Mindanao nunot sa programa ni Pres Bongbong Marcos nga pagbaligya sa tag-20 pesos per kilo sa bugas sa Cebu City ug Bohol.
Namahayag si NFA 10 regional information officer Zenelyn Kwong nga anaa sa sobra 320-mil ka sako sa bugas ang nagsilbing buffer stocks sa rehiyon ug gamay lang ang gimando kanila nga ipadala sa Kabisayaan.
Siya miingon nga dili usab bukbukon nga klase sa mga bugas ang nahuptan sa NFA kay gikan mismo kini sa mag-uuma sa rehiyon ug dili imported rice.
Hisayrang gitahasan sila mopadala didto sa Visayas sa sobra 23-mil ka sako sa bugas-humay isip pag-abag sa saad ni Pres Marcos.
