Gipasabot ni NFA Misamis Oriental Acting Branch Manager Kharreb Retiza nga ang matag kwalipikadong benepisyaryo sa ₱20 kada kilo nga bugas sa ilawom sa programa sa administrasyon adunay katungod nga makapalit hangtod 30 kilos kada bulan.
Sa iyang interbyu sa Bombo Radyo, miingon si Retiza nga ang maong gidaghanon gibahin‑bahin aron mahimong 10 kilos kada semana, depende sa pag‑adto sa mga benepisyaryo sa redemption site sa Baloy, Cagayan de Oro City.
Kini aron mas daghan ang maka‑avail sa maong subsidized rice.Dugang pa niya, ang sistema sa programa dili base sa household kundi per beneficiary.
Busa ilang giawhag ang matag kwalipikadong indibidwal nga mubalik ug mupalit basta kompleto sa ID ug sakop sa vulnerable sector.
Padayon matod pa ang pagmonitor sa mga personahe sa Department of Agriculture (DA) ug National Food Authority (NFA), inubanan sa Food Terminal Inc. (FTI), aron masiguro nga masunod ang limitasyon ug malikayan ang sobrang pagkuha sa bugas sa usa ka benepisyaryo.
Nagpadayon usab ang pagdagsa sa mga tawo sa redemption sites, ug gibanabana nga 500 ka benepisyaryo ang maasikaso matag adlaw samtang nagpadayon ang implementasyon sa programa.
