Andam mosuplay ang NFA Misamis Oriental sa panginahanglanon sa P20 rice program kon maaprobahan ang pagbaligya ug distribusyon sa bugas matag barangay.
Kini ang gipahayag ni Kharren Retiza, acting branch manager sa maong opisina, sa iyang interbyu sa Bombo Radyo.
Matod ni Retiza, gipaabot pa sa pagkakaron ang pag‑apruba sa memorandum of agreement (MOA) tali sa LGU ug mga kaabag nga ahensya aron masugdan ang implementasyon sa plano.
Dugang pa niya, ang lokal nga panggamhanan maoy motino kon sila mismo ang mohatod sa bugas sa matag barangay o pinaagi sa mga opisyal sa barangay, base sa alokasyon ug panginahanglan sa matag lugar.
Gipasabot usab niya nga sa bahin sa NFA, andam sila sa bisan unsang oras sa paghatag sa gikinahanglang suplay sa bugas aron suportahan ang maong programa.
Samtang giklaro usab ni Retiza nga walay gahum ang buhatan sa NFA sa pagkontrolar sa presyo sa bugas sa merkado ug nakapokus sila karon sa paghatag og suplay alang sa mga programa sa gobyerno.
