Namahayag si Atty. Alan Geñoso nga ang “Anti-Hospital Deposit Law” nagdili sa mga ospital sa pagpangayo og deposito kon kinahanglan dayon tambalan ang pasyente.
Matud niya sa interbyu sa Bombo Radyo, una kining giila ubos sa BP 702 ug gipalapdan pinaagi sa Republic Act No. 8344 aron mas klaro nga bawal ang pag-demand og deposit o advance payment.
Subay sa RA 8344, ilegal nga mo-balibad ang ospital sa paghatag og inisyal nga pagtambal tungod lamang kay wala pay nahatag nga deposito.
Iyang gipasiugda nga daghang susamang kaso atol sa COVID-19 pandemic diin adunay mga ospital nga mibalibad sa emergency cases, bisan pa man nga anaa sa dakong katalagman ang pasyente. (Phillip Ariata)
