Mihangyo ang pamilyang Antatico sa liderato sa National Irrigation Administration/NIA nga dili na tumpangan ang social media posts ni late Niruh Kyle Antatico kinsa tinuyo nga gipusil-patay sa armadong kalalakihan sa Crossing,Brgy Patag ning syudad.
Kini ang apelar ni Jennova Antatico,kapikas sa biktima kinsa pabiling nagpugong sa iyang gibati taliwala sa dili maayong nahitabo sa ilang pamilya epekto sa hitabo.
Matud sa asawa ni Kyle nga unta kung dili sad-an o walay gihimong dautan ang taga-NIA ang dili na tumpangan ang nagkatag nga social media posts kabahin sa maong gihisgutan nga mga proyekto.
Nagsumikad ang apelar ni Jennova sa nabasa niya nga online news diin misulti si NIA administrator Engr.Eduardo Eddie Guillen nga sayop ang impormasyon nga gipanulti sa biktima.
Si Kyle gisundan sa motorcycle in tandem suspects gikan sa iyang balay ug igo nahatod ang kapikas niini,gitaparan diin gilayong gipusil sulod sa gimanehong sakyanan gamita ang kalibre 9mm pistol hinungdan sa kamatayon sa miaging Oktobre 10.
Dumduman nga nakadawat sa daghang death threats si Kyle sukad sa iyang corruption expose sugod Nobyembre 2024.
Si Kyle nalubong na pinaagi sa pag-cremate sa iyang lawas niadtong Huwebes.
Sa panig usab sa NIA 10,nagpasalig sila nga mokooperar sa gihimong imbestigasyon sa Special Investigation Task Group kay bisan sila gusto mahatagan sa tinud-anay nga sulbad ang kamatayon ni Antatico.
Gani,mitanyag pa ang maong buhatan sa balor 100-mil pesos nga reward money ngadto sa mga tawo nga makatabang pagkab-ot sa kasulbaran sa nahitabo sa ilang kanhi kauban.
