CAGAYAN DE ORO CITY – Gihatagan sa taas nga respeto sa Police Regional Office 10 ang hukom ni Pres Bongbong Marcos nga gitudlo isip bag-ong PNP chief ang kontrobersyal nga si CIDG commander Major General Nicolas Torre III epektibo Hunyo 7 ning tuiga.
Kini epekto sa pag-retiro usab sa katungdanan ni PNP chief Gen Rommel Marbil nga nahataga’g lugway ni Marcos nunot sa panginahanglan nga malahutay ang preparasyon ug pagpatuman sa seguridad sa milabay’ng May 12 elections sa nasud.
Namahayag si Police Major Joann Navarro,tigpamaba sa PRO 10 nga unta dili tan-awon sa publiko ang isyu sa politika apan ang pagsilbi nga neutral sa PNP ug prioridad ang pagtutok sa pagsulbad sa mga dagkong panghitabo sa nasud.
Kontrobersyal si Torre nunot sa iyang pagsunod kamanduan sa iyang senior PNP officials nga dakpon si Pastor Apollo Quiboloy nga nag-atubang sa daghang kasong kriminal ug bisan si kanhi Pres Rodrigo Duterte nga adunay crimes against humanity case nga pending sa International Criminal Court sa Netherlands.
