CAGAYAN DE ORO CITY – Andam na ang Northern Mindanao Medical Center o NMMC nga mohimo sa testing sa coronavirus disease 19 dinhi sa syudad.
Kini human ila nang nadawat ang license to operate sa ilang genexpert machine gikan sa Dept of Health 10 kagahapong adlawa.
Gibutyag ni NMMC media bureau representative Dr Bernard Rocha nga gihulatan na lamang nila nga moabot ang cartridges aron masugdan ang Covid-19 testing.
Ang maong ekipo ang adunay kapas mga makahimo sa 36 tests matag adlaw diin makuha ang resulta sulod sa 30 hangtud 45 minutos.
Samtang laraw ni City Mayor Oscar Moreno nga magpalit sa dugang testing machine alang sa NMMC.
Kini gumikan kay ang napalit nga Real-Time Polymerase Chain Reaction machine sa city hall ang gipadala sa DOH-10 testing laboratory.
Gani, gimanduan ni Moreno ang city logistics department nga magpalit sa dugang PCR machines.
Una nang gibutyag sa alkalde nga lauman ang pagsaka sa ihap sa positive cases sa bayrus ilabina nga nagbaton na sa kaugalingong testing machine ang rehiyon-10.
Gitin-aw ni Moreno nga iyang dugangan ang pagpamalit sa dugang testing machine aron maggamit kini dili lang sa rehiyon-10 apan lakip na usab sa mga kasikbit nga lugar sama sa Caraga Region.
Miingon si Moreno nga dili maayo nga ihikaw sa NMMC ang kapasidad niini nga makahimo sa Covid-19 testing.
Gidugang pa niini nga nagbaton lamang sa tulo ka testing centers ang Mindanao nga gilangkuban sa Davao, Zamboanga, ug Cagayan de Oro City taliwala nga nagbaton kini sa unom ka rehiyon.
