CAGAYAN DE ORO CITY – Ipatawag sa konseho ang kadagkuan sa Northern Mindanao Medical Center kabahin sa isyu sa namatay’ng bata nga giingong wala maatiman samtang naghambin sa sakit nga dengue ning syudad.
Kini sa tuyo nga mahatagan sa katin-awan ang konseho kon unsa’y basehan sa ilang prioridad sa mga pasyente nga mahatagan sa dinalian nga pag-atiman.
Kini human unang gi-special report ni City Council Minority Leader Kagawad James Judith ang reklamo sa usa ka amahan nga daw wala sila maatiman sa taga-NMMC bisan kon gi-refer na sa J.R Borja City Hospital aron madali pagtambal ang 1-year old nga dengue patient.
Miingon si City Vice Mayor Jocelyn ‘Bebot’ Rodriguez nga dili na kini bag-o nga hitabo.
Siya miingon nga gitahasan nila ang committee on health aron maka-esplikar ang taga-NMMC kabahin sa special report ni Judith.
Samtang giawhag ni Konsehal Edgar Cabanlas ang iyang mga kauban sa konseho nga dili diha-diha hukman ang medical workers sa NMMC sa pasangil nga nagpasagad sila sa mga pasyente.
Miingon si Cabanlas nga daghang rason kon nganong dunay higayon nga malanga’g gamay ang paghatag pagtagad sa mga pasyente nga ma-refer sa maong ospital.
Siya miingon nga mismo ang iyang anak kinsa doktor sa NMMC ang saksi kon unsa ka bun-og sa trabaho ug ubos ang suweldo sa medical workers samtang nangatiman sa gatusang pasyente kada-adlaw.
Sa pagkutlo ning balita,wala pa’y gilugwa nga komento ang kadagkuan sa NMMC kabahin sa special report ni Judith.
