CAGAYAN DE ORO CITY – Miduso sa early retirement ug wala napugos pag-resign sa katungdanan si Dr Jose Chan kinsa kasamtangang medical director sa Northern Mindanao Medical Center o NMMC ning syudad.
Kini ang katin-awan ni NMMC liason officer Dr Bernard Julius Rocha batok sa mga impormasyon nga napugos paghawa si Chan tungod sa gikalalis niini nga kaubang doktor sa miaging semana.
Miingon si Rocha nga naka-on leave usab si Chan samtang naghulat sa aprobal sa Dept of Health Manila sa iyang pag-retiro sa serbisyo.
Una nang gikatingala sa publiko ang kalit paghawa ni Chan ilabina nga anaa sa dakong suliran ang rehiyon tungod sa pandemya sa coronavirus disease.
