CAGAYAN DE ORO CITY –Gikompirmar sa Northern Mindanao Medical Center nga dunay naka-plano nga mass resignation ang health care workers nga gilakipan sa mga nurse kinsa mibati na’g kakapoy sa walay hunong nga pagsaka sa COVID-19 ning syudad.
Miingon si NMMC Research Dept head Dr Gina Itchon nga gilayong gitigom sa ilang kadagkuan ang tanang nursing dept heads aron lingkuran ug pangitaa’g sulbad ang mga reklamo niini.
Una nang nabulgar ang dugay nga pagkahatag sa daghang benepisyo nga gipasalig sa Bayanihan Law 2 sa medical ug health care frontliners nga nag-atiman sa mga pasyente nga positibo sa COVID.
Samtang mihangyo si City Mayor Oscar Moreno sa NMMC nurses nga dili mohimo’g mass resignation sa ilang trabaho ug pag-atiman sa mga pasyente nga positibo sa COVID-19 gikan sa nagkadaiyang bahin sa rehiyon.
Kini tungod kay adunay dako nga epekto niini ilabina nga dili lamang taga-syudad ang isulod sa maong ospital apan bisan ang gikan sa laing mga probinsya.
Una usab niini,mikatag ang report nga may pipila ka nurses sa J.R. Borja Memorial City Hospital ang nagbahad nga mag-mass resignation apan kusganon kining gihimakak sa city hall.
Dugtong usab niini,gisugdan na sa Dept of Health ang pagpangita’g pondo aron magamit pagsuweldo sa dugang nurses nga makabase sa Northen Mindanao Medical Center ning syudad.
Kini ang tubag ni Health Sec Francisco Duque sa paggisa kaniya ni House Deputy Speaker ug CdeO 2nd District Rep RufusRodriguez kabahin sa isyu daghang isyu nga gipabati sa mga dismayado nga mga nurse sa nasud.
Hisayrang kabahin ang kakulang sa nurses ang kabahin sa reklamo sa mga gusto mohimo’g mass resignation kon pabiling dili tagdon ang ilang mga yangungo sa gobierno.
