CAGAYAN DE ORO CITY- Representahan sa Northern Mindanao Athletics Association o NMRAA baseball elementary boys ang Pilipinas alang sa Asia Pacific and Middle East Baseball League Series sa South Korea sa Hulyo 2019.
Kini human gipildi sa rehiyon ang hugot nga karibal niini nga Western Visayas Regional Athletics Association sa kulbahinam nila nga dula sa Palarong Pambansa sa Davao City sa miaging semana.
Miingon si NMRAA sports supervisor Dr Raymond Antolo nga tungod sa maayong opensa ug depensa sa 12 ka magdudula sa rehiyon,gipildi nila ang Western Visayas sa final score 3-0.
Gibutyag ni Antolo nga usa ka garbo nga subli mo-representar ang rehiyon alang sa Pilipinas sa apilan nga international competition sa Seoul City ning tuiga.
Kini na ang ikaduhang higayon nga representahan sa NRMAA ang Pilipinas sa kompetisyon dihang nagkampeon usab sa maong dula niadtong 2017 Palarong Pambansa sa probinsyan sa Antique.
Bisan nga nahulog sa top 5 ang NRMAA apan hawid usab niini ang mga kampeonato sa sepak takraw,baseball,swimming ug boxing elementary boys sa Palarong Pambansa 2019.
Nasayran nga ang NRMAA ang nagbaton sa 70 ka medalya nga gilakipan sa 17 golds,27 silvers ug 26 bronze sa Davao City sa miaging semana.
