CAGAYAN DE ORO CITY – Agaw eksena ang nakab-ot nga kalampusan sa grade 4 pupil sa Initao Central School sa Misamis Oriental nga si Shayne Mark Monreal sa padayong Palarong Pambansa sa Laoag City,IlocosNorte.
Kini tungod kay bisan sa iyang linghod nga edad,nahakot niini ang upat ka gold medals sa giapilan nga mga dula sa arnis ilabina sa elementary boys division.
Siya miingon nga dili lang kaniya ang maong kalampusan apan sa tibuok Northern Mindanao Regional Athletics Association nga kabahin sa nakig-kumbati sa national games ning tuiga.
Kabahin sa nadag-an ni Monreal ang mga kategorya sa Synchronized Likha Anyo – Single Weapon, Synchronized Likha Anyo – Double Weapon, Likha Anyo – Espada Edaga ug Mixed Double Weapon.
Dugtong niini,namahayag ang 9 anyos nga taga-Misamis Oriental nga gusto niya nga mahimong nasudnong atleta sa natad sa arnis.
Apan bisan niini,anaa ang iyang pangandoy nga mahimong usa ka pulis kay aron daw makatabang sa pagminintar sa kahusay’g kalinaw dinhi sa lalawigan.
Hisayrang ang arnis team ubos sa Iligan City ug Misamis Oriental ang dunay pinakadahang medalya nga nasakmit sa Palarong Pambansa ning tuiga.
