CAGAYAN DE ORO CITY – Mikuha’g inspirasyon gikan kang Hungarian world chess champion Judith Polgar ang reigning gold medalist sa elementary girls category sa Department of Education-Misamis Oriental Division nga si Mary Janelle Tan.
Kini ang pagsugilon sa iyang amahan ng si Brandly Tan nga maoy nagbansay sa gihuptang abilidad ug kapasidad sa anak nga tulo ka higayon nang nag-representar sa Northern Mindanao Regional Athletics Association (NMRAA) diin nakakuha’g 3 gold medals ug silver sa nangaging Palarong Pambansa.
Gibutyag sa Bombo Radyo sa amahan nga sobra ang pagbilib nila sa iyang kapikas na si Pamela Tan kay napakita ug napatuman sa ilang anak ang gihaguan nila sa trainings sa bag-uhay lang natapos nga Palarong Pambansa sa Laoag City,Ilocos Norte ning semanaha.
Gitumbok niini ang nasakmit nga gold medal sa anak sa chess-blitz event individual diin pagsugod sa kapaspas makasakmit sa kadaugan sa limitado lang nga oras.
Siya miingon nga daghan nang libro ni Polgar ang gibasa ug natun-an sa ilang anak gawas sa domestic strategies nga gihimo nila sa mga pag-ensayo ayha ang paglambigit sa Palarong Pambansa 2025.
Hinoon,wala na sila makurat sa katakos sa ilang anak nga ‘aggressive type player’ tungod kay bisan ang igsoon niini nga si Mary Joy Tan ang produkto gihapon sa daghang Palarong Pambansa diin nakadula sa international chess tournaments ayha gikuha sa Far Eastern University isip varsity.
Hisayran ang magtiayong Brandly ug Pamela ang pulos ma-abilidad usab sa dulang chess apan wala sukad nahataga’g higayon makadula sa mga torneyo ingon man Palarong Pambansa rason nga buhos ang ilang suporta sa duha nila ka anak.
