CAGAYAN DE ORO CITY -Gibarugan ni Presidente Rodrigo Duterte ang pagdumili nga makig-negosyar sa mga bandidong Abu Sayyaf Group,Maute ug Bangsamoro Islamic Freedom Fighters o BIFF nga dakong bahad sa Mindanao.
Kini ang gibutyag ni Pres Duterte atol sa eksklusibong interbyu sa Bombo Radyo sa dihang gibisita ang haya nila ni PFC Oshen Rosala ug Cpl Marzon Morales nga gipahiluna sa Saint Ignatius de Loyola Parish sa 4th ID,Philippine Army,Camp Evangelista,Barangay Patag sa syudad.
Si Duterte miingon nga mas prioridad sa gobyerno ang pakig-negosyar sa Communist Party of the Philippines-New People’s Army-National Democratic Front (CPP-NPA-NDF) ug pagpadayon sa Bangsamoro Framework tali sa Moro Islamic Liberation Front ingon man sa Moro National Liberation Front nga naakasulod sa Autonomous Region of Muslim Mindanao o ARMM.
Ang pagbisita ni Duterte ang ikatulo na higayon sa Kampo Evangelista diin duha niini ang tungod sa pagpaabot sa simpatiya sa mga sundalong namatay ug samaron sa pakig-engkuwentro sa rebeldeng NPA dinhi sa Amihang Mindanao.
