Opisyal nang sugdan sa Pilipinas ang chairmanship sa ipahigayong mga aktibidad sa Association of Southeast Asian Nations (ASEAN). Sugod Enero 25 hangtud 29, ipahigayon sa Cebu ang ASEAN Foreign Ministers’ Retreat (AMM).
Sa pagka Enero 26 hangtud 30, ilusad ang ASEAN Tourism Forum. Unang namahayag si Foreign Affairs Deputy Assistant Secretary Domic Xavier Imperial nga gipangandaman sa Pilipinas ang mukabat sa 650 summits ug managlahing pulong sa ASEAN sa tibook tuig.
Sa bulan sa Mayo, ilusad ang 48th ASEAN Leaders’ Summit and Related Summits sa petsa 8 kutob 9. Segundahan kini sa 49th ASEAN Summit and Related Summits sa Nobyembre 10 hangtud 12.
Kining duha ka summits ipatuman sulod sa bag-ong gi-renobar nga Philippine International Convention Center (PICC) sa Pasay City. Sa pagka-Hulyo, panguluhan sa Pilipinas, isip host country ang commemorative activities alang sa 50th anniversary sa Treaty of Amity and Cooperation in Southeast Asia (TAC) sa petsa-24 sa PICC.
Ang TAC usa ka legal nga dokumento nga nagtakda sa pundasyon alang sa malinawon nga pagkinabuhi, pagsalig ug kalig-on sa mga nasud sa rehiyon o miyembro sa ASEAN.
Gipirmahan kini sa labing sa 55 ka partido, lakip ang mga global leaders sa Estados Unidos, China, Japan, France, Canada, European Union, India ug Russia.
Una niini, gikompirmas sa Philippine Coast Guard sa Bombo Radyo nga mupatuman sila sa NO SAIL ZONE sa Bohol ug Cebu alang sa unang mga aktibidad sa ASEAN 2026.
