Muapelar sa nasyonal nga lebel ang Northern Mindanao Federation Transport Cooperative batok sa ipatuman nga Service Contracting Program sugod Abril 15, tungod sa disbentaha niini sa mga provincial liner nga bus.
Gibutyag ni Luzminda Escobida, PONTRANSCO President, dili angay iparehas ang modelo nga gigamit sa Metro Manila ngadto sa mga probinsya tungod kay lahi ang sitwasyon sa operasyon, ruta, ug gidaghanon sa pasahero sa mga provincial areas.
Hinungdan nga ilang gustong ipadayag sa kaulohan ang ilang apela aron marepaso ang polisiya.
Dugang pa niya, bisan pa sa padayon nga pagpagawas sa ayuda ug fuel subsidy, para kanila dili gihapon kini igo ug pang-usa lamang ka adlaw nga consumption sa ilang mga unit.
Inubanan pa kini sa padayon nga pagsaka sa presyo sa gasolina nga naghatag og dugang kabug-aton sa mga drivers ug operators.
Giingon pa niya nga wala pa gihapon maabot sa tanang miyembro sa ilang kooperatiba ang maong ayuda.
Sa karon, padayon ang paningkamot sa kooperatiba sa pag-apelar ug pakig-istorya sa gobyerno aron masiguro nga mahatagan sa hustong konsiderasyon ang kahimtang sa mga provincial transport operators.
