CAGAYAN DE ORO CITY – Gi-depensa ni Cagayan de Oro 2nd District Rep Rufus Rodriguez kon nganong kusganong gisupak niini ang House Bill 6875 o Anti-Terrorism Act of 2020 nga gusto ipatuman ni Pres Rodrigo Duterte sa nasud.
Miingon si Rodriguez nga suportado niini ang pagsumpo sa kalihukan sa terorismo apan may mga probisyon sa balaodnon nga dakong peligro nga maabusaran ang katungod sa katawhan.
Dugang sa kongresista nga wala sila hatagi’g igong panahon sa liderato sa Kongreso aron matuki ang mga probisyon sa HB 6875 nga dili klaro alang sa publiko.
Samtang gipili ni Bukidnon 3rd District Congressman Manuel Zubiri nga mag-abstain sa pagbotar sa anti-terrorism act of 2020 nga aprobado na sa 3rd and final reading sa Kongreso.
Miingon si Zubiri nga gikinahanglan ang lig-ong balaod kontra terorismo apan mas gipili niini nga dili mobotar kay kabalaka kini sa maong balaodnon.
Una usab niini,nag-yes votes sa maong balaodnon sila si Cagayan de Oro 1st District Rep Rolando Klarex Uy, Camiguin Lone District Rep Xavier Jesus Romualdo,Iligan City Lone District Rep Frederick Siao,Misamis Occidental 1st District Rep Diego Dy,Misamis Occidental 2nd District Rep Henry Oamina ug Bukidnon 4th District Rep Rogelio Neil Roque.
Samtang kuyog sa pag-abstain ni Zubiri si Misamis Oriental 1st District Rep Christian Unabia,Bukidnon 1st District Rep Maria Lourdes Acosta-Alba;Lanao del Norte 1st District Rep Khalid Dimaporo,Lanao del Norte 2nd District Rep Abdullah Dimaporo.
Subay sa data gikan sa Kamarabaha,walay gihatag nga yes or no votes usab sila si Misamis Oriental 2nd District Cong Juliette Uy ug Bukidnon 2nd District Rep Jonathan Keith Flores.
