CAGAYAN DE ORO CITY – Gihupay sa Police Regional Office 10 ang kahingawa sa publiko nga hayan mahitabo usab ang gidangatan ni Negros Oriental Gov. Roel Degamo ngadto sa pipila ka dagkong elected govt officials sa rehiyon.
Kini tungod sa kabalaka ni Pres Bongbong Marcos nga dunay naglihok nga mga private armed group nga sagad gamiton sa pipila ka politiko aron pamatyon ang ilang mga ribal sa politika.
Miingon si PRO 10 spokesperson Police Maj. Joann Navarro nga sa kasamtangang pagsusi sa ilang lower units,wala na’y mga armadong pundok nga gihuptan ang dagkong mga pamilya sa politiko dinhi sa rehiyon.
Apan miingon si Navarro nga mohimo sila’g balik sa pagpakisusi aron masiguro nga mamintinar ang kahusay’g kalinaw alang sa katawhan sa rehiyon.
Sa wala pa ang kamatayon ni Degamo,na-ambush usab apan naka-survive si Lanao del Sur Gov Mamintal Adiong Jr sa miaging Pebrero ning tuiga.
Samtang gipaklaro usab sa liderato sa 4th ID,Philippine Army nga dili basta-basta nga makabaton sa sobrang mga armas ang ilang mga sundalo aron mohatag seguridad kon hangyoon sa pipila ka govt elected officials ubos sa ilang area of responsibility.
Gihimo ni 4th ID spokesperson Army Maj Francisco Garello Jr ang katin-awan nunot sa pagkalambigit sa pipila ka kanhi sundalo sa pagpatay kang Degamo.
Siya miingon nga wala usab sila’y nasagapan nga bag-ong mga impormasyon nga dunay naglihok nga private armed groups nga pinakaon sa pipila ka dagkong mga politiko sa Caraga ug Norther Mindanao regions.
Sa pikas bahin,gisugyot ni Lanao del Sur 1st District Rep. Zia Alonton Adiong nga marebyo ang ‘peace mechanism’ tali sa Philippine government ug Moro Islamic Liberation Front o MILF.
Kini aron mamintinar ang kahusay’g kalinaw sa Bangsamoro Autonomous Region in Muslim Mindanao.
Gihimo sa kongresista ang apelar nunot sa pagka-ambush apan naluwas nga si Lanao del Sur Governor Mamintal ‘Bombit’ Adiong Jr sa miaging bulan.
Miingon si Adiong nga kon walay himoon ang gobierno kabahin sa hitabo,hayan mabalik ang kagubot sa pipila ka bahin sa rehiyon tungod sa pipila ka dautang mga pundok.
Hisayrang sa maong ambush,patay ang upat sa mga escort sa gobernador.
