CAGAYAN DE ORO CITY- Gikaguol karon sa mga grupo nga nag-abdokasiya sa lahutay nga kalinaw ang mando ni Pres Rodrigo Duterte nga subli ipadakop ang 21 ka peace consultants gikan sa Communist Party of the Philippines-New People’s Army-National Democratic Front o CPP-NPA-NDF.
Kini human hingpit nang gikanselar ni Pres Duterte ang peacetalks ngadto sa maong grupo.
Miingon si IFI Bishop Felixberto Calang,convenor sa Sowing Seeds of Peace in Mindanao nga unta subli huna-hunaon ni Pres Duterte ang iyang nakab-ot nga hukom sa maong hisgutanan.
Tungod niini,mahimong subli dakpon si NDF peace consultant Alfredo Mapano alyas Ka Pares nga kanhi binilanggo sa Misamis Oriental Provincial Jail.
Miingon si Calang nga bunga sa naghinobra nga emosyon lamang ni Pres Rodrigo Duterte kon nganong gitawag niya nga mga terorista ang pundok sa CPP-NPA-NDF.
Kini ang paghulagway ni Calang kang Pres Duterte nga mibati’g kasuko batok CPP-NPA-NDF tungod sa linu-og nga pagpatay sa 3 ka sundalo sa Bukidnon sa miaging semana.
Miingon si Calang nga nasabtan nila ang gibati ni Duterte ilabina nga siya ang AFP commander-in-chief diin mao kadto’y gidangatan sa mga sundalo nga gi-ambush sa mga rebelde.
Samtang giawhag ni Citizens Watch for Good Governance o CWGG convenor Atty Antonio Soriano ang gobierno ug CPP-NPA-NDF nga mobalik sa lamisa aron subli ipadayon ang peace negotiation.
Kini tungod kay magpabiling pakyas ang dangatan sa duruha kon subli lamang sila mag-engkuwentro.
Kumbinsido usab si Soriano nga maulian ra ang pag-aslom sa relasyon ni Pres Rodrigo Duterte ug CPP founder Jose Maria Sison ilabina nga taas ang ilang kasinatian isip maghigala.
Samtang gilayong dakpon sa kapolisan kon makakita sila’g maayong higayon si National Democratic Front o NDF peace consultant Alfredo Mapano alyas Ka Pares.
Kini ang panganti ni City Police Director Sr Supt Ronnie Francis Cariaga human giila ni Pres Rodrigo Duterte nga mga terorista ang CPP-NPA-NDF diin naglakip kang Ka Pares.
Gibutyag ni Cariaga nga anaa ang ilang koordinasyon sa militar aron matumbok ang lokasyon ni Ka Pares nga nagtagu-tago na ning panahona tungod sa mando ni Pres Duterte nga sikupon ang 21 ka CPP-NPA-NDF peace consultants.
