CAGAYAN DE ORO CITY – Hingpit nang giwagtang sa Police Regional Office 10 ang travel authority requirement sa matag–biyahidor gikan sa nagkadaiyang probinsya dinhi sa Northern Mindanao.
Kini human unang miani sa kontrobersya ug pagsaway ang maong palisya nga naggikan sa Camp Crame sa kauluhan alayon sa pagbatok sa coronavirus disease.
Miingon si PRO-10 spokesperson Lt Col Mardi Hortillosa nga nagkahulugan kini nga mahimo nang makabiyahe ang publiko sa bisan asa nga bahin sa rehiyon.
Giklaro ni Hortillosa nga tugtan makabiyahe ang katawhan ubos sa kondisyon nga importante ang katuyuan niini sa ilang mga paglakaw.
Samtang giisip ni City Mayor Oscar Moreno nga kadaugan alang sa katawhan ang pagpahunong sa PNP nga ipakuha’g travel authority ang mga biyahidor dinhi sa rehiyon.
Kini human unang gi-kuwestiyon ni Moreno ang sayop nga interpretasyon sa PNP kabahin sa maong kamanduan gikan sa Inter- Agency Task Force sa kauluhan.
Gibarugan sa mayor nga dili mahitabo nga magdoble’g kuha sa travel authority ang katawhan sa syudad padulong sa lalawigan ug vice versa kay nasakop lamang kini sa usa ka teritoryo.
Una nang gidangop ni Moreno sa Camp Crame ang maong isyu aron mapadali ang pagpahunong sa pagpalugwa sa travel authority.
