CAGAYAN DE ORO CITY – Milapas na sa 6,000-mark ang ihap sa mga tawong natakbuyan sa COVID-19 sa Northern Mindanao.
Segun sa COVID-19 Briefer No. 286, kinatibuk-ang 6,054 ang case infection sa rehiyon gikan sa 80 ka mga bag-ong kaso nga nadugang kagahapong adlawa.
Gibutyag ni City Health Office head Dra Lorraine Nery nga sa maong ihap, 78 ang local cases diin naglumba pagsaka ang kaso sa Cagayan de Oro nga mitala sa 29 local cases ug 25 sa Misamis Occidental.
Napugngan na sa probinsya sa Bukidnon ang pagkuyanap sa local case,busa mitala na lamang kini sa 5 ka kaso lakip na sa 11 kaso sa Misamis Oriental; pito sa Iligan City ug usa sa Lanao del Norte.
Dugtong niini, napun-an pa sa 2 ka LSI nga nagpositibo sa bayrus ang syudad samtang usa ka local case ang namatay kagahapong adlawa.
Samtang misaka pa sa 176 ang patay tungod sa COVID-19 sa Northern Mindanao sukad nga natala ang unang kaso sa mga namatay sa Marso 2020.
Ang lab-as nga mga fatalities nagsumikad sa mga local cases sa Cagayan de Oro ug Iligan City.
Kini ang rason nga nabalaka si City Mayor Oscar Moreno hinungdan sa iyang pagduha-duha sa pagpatuman sa bag-ong curfew hours sa syudad.
Namahayag si Moreno nag mahimong critical period ang ilang obserbasyon sa nabiling duha ka semana sa Nobyembro kon angayan ba nga luagan ang pagpatuman sa curfew hours.
Una niini, taliwala sa pagsaka sa mga namatay ug bag-ong mga natakdan sa syudad, padayon usab nga milig-on ang porsiento ug ihap sa mga naulian sa rehiyon.
Ning adlawa, 42 ka pasyente ang naulian diin 25 gikan sa Cagayan de Oro; 1 sa Misamis Occidental; 5 sa Misamis Oriental; ug 11 sa Iligan City.Misaka pa sa 4, 731 ang total recoveries sa tibuok rehiyon.
