CAGAYAN DE ORO CITY – Nagbaton na sa duha ka positibong kaso sa omicron variant sa COVID-19 ang Northern Mindanao.
Kini ang kompirmasyon ni Dept of Health 10 regional director Dr Jose Llacuna Jr nga gilangkuban sa usa ka lalaki ug babaye.
Miingon si Llacuna nga hinoon ang maong mga pasyente ang na-limitahan sa ilang exposure kay paghidangat nila sa gikan sa ilang mga biyahe ang gilayon sila gipaubos sa mandatory isolation sa Metro Manila ug Cebu City ayha hingpit nakasulod dinhi sa rehiyon.
Una nang gikompirmar sa DoH-Manila nga anaa na sa 43 ka kaso ang omicron variant sa nasud diin duha niini ang gikan sa Northern Mindanao.
Samtang gitakdang subli ipaubos sa re-swabbing ang duha ka taga-Northern Mindanao nga nagpositibo sa omicron variant sa COVID-19.
Kini sa pagsiguro nga sila hingpit nang negatibo sa bayrus nga mitakboy sa ilang mga panglawas.
Gibutyag ni Dr Stephanie Grace Zamora,cluster head sa RESDU sa DoH 10 nga bugtong ang seaman nga gikan sa Kenya ang nakauli sa iyang pamilya sa Iligan City.
Nagpasabot nga pabiling naka-isolate pa gihapon sa kauluhan ang pasyenteng babaye nga taga-Brgy 1 ning syudad kinsa gikan sa Las Vegas,USA tungod sa pagka-takdi sa bayrus.
Gipaubos na usab sa mandatory isolation ang mga tawo nga pinakaulahi nga gikauban sa maong mga pasyente nga naigo sa omicron.
Dugtong niini,dili did-an ni City Mayor Oscar Moreno nga makauli ang mga taga- Cagayan de Oro ug Misamis Oriental sa ilang mga pamilya bisan kon nagbaton na sa duha ka kaso sa omicron variant sa COVID-19 ang rehiyon.
Miingon ang mayor nga dili niya tuyo nga gub-on ang kahimtang sa ekonomiya apan mas prioridad niini ang aspeto sa panglawas.
Gihimo ni Moreno ang katin-awan nunot sa ubang mga probinsya ug syudad nga naghugot na sa ilang border lines aron e-kontrol ang pagsulod sa mga tawo nga dili kaugalingon nila nga mga residente.
