CAGAYAN DE ORO CITY – Gikompirmar karon sa Dept of Health o DoH 10 nga laing duha ka pasyente ang positibo sa coronavirus disease 19 sa Northern Mindanao.
Miingon si Dr Ian Gonzales,head sa infectious disease cluster sa DoH 10 nga nagikan ang maong mga pasyente sa Iligan City ug Lanao del Norte.
Tungod niini,mitala na ang rehiyon sa 35 ka positibong kaso sa maong sakit.
Dugtong niini,gipadumduman ni Gonzales ang publiko nga pabiling dili magpasagad sa ilang mga panglawas tungod sa taas nga bahad sa bayrus.
Samtang giila ni Dept of Health 10 regional director Dr Adriano Suba-an ang dakong kontribusyon sa upat ka health workers nga nag-positibo sa coronavirus disease sa rehiyon.
Gihimo ni Suba-an ang komento dungan sa iyang paghatag sa sin-miel pesos nga cash assistance sa iyang kaubang health official sa DoH-10 nga anaa sa severe condition sa bayrus.
Gawas niini,gihatagan usab ni Suba-an sa pagyukbo ang laing tulo ka health workers gikan sa Tudela,Misamis Occidental,Manolo Fortich,Bukidnon ug Camiguin.
Samtang mihangyo si City Mayor Oscar Moreno sa mga motorista nga sundon na lamang ang gabayan nga gilugwa sa Inter-Agency Task Force o IATF sa pagdili pag-angkas sa mga motorsiklo.
Kini human miani’g lain-laing reaksyon ang ‘no backride policy’ sa IATF aron mapalig-on ang social distancing sa katawhan.
Miingon si Moreno nga kon siya pa lamang unta ang pagbut-on,itugot niya kini apan mas dunay gahom ang IATF alang niini.
Una nang gitahasan sa task force ang PNP,LTO ug ubang law enforcement agencies nga sitahon bisan magtiayon nga magsakay sa motorsiklo tungod sa social distancing policy sa gobierno.
