CAGAYAN DE ORO CITY – Gi-depensa ni DoH 10 regional director Dr Jose Llacuna Jr kon nganong gi-konsiderar na nga dunay duha ka kaso sa omicron partikular gikan dinhi sa syudad ug Iligan City nga unta wala man sila makasulod pa dinhi sa Northern Mindanao.
Kini human unang gikompirmar sa Philippine Genome Center nga naggikan sa Brgy 1 ning syudad ang 20 anyos nga dalaga nga positibo sa omicron apan na-hold sa kauluhan nga nagsumikad sa Amerika ug laing seaman gikan Kenya nga kanhi isolate sa Cebu City.
Miingon si Llacuna nga tinood nga wala pa’y local transmission sa omicron sa rehiyon apan mas maayo nga mangandam na silang daan kay sa dili madugay masudlan ra gihapon ang syudad o ubang lugar sa Mindanao.
Samtang bisan niini,dawaton ni City Mayor Oscar Moreno kon itugot na sa IATF nga makauli ang 20 anyos nga dalaga nga gikan Las Vegas,Nevada,USA nga residente dinhi sa dakbayan nga kabahin sa positibo sa omicron variant.
Kini ang katin-awan sa mayor nunot sa pangutana kon pasudlon ba sa dakbayan ang maong pasyente kon hingpit nang maka-rekober batok sa maong sakit.
Gibutyag ni Moreno nga gilayon man nga na-isolate ang maong pasyente hinungdang dili kini peligro kon makauli na pabalik sa syudad.
