CAGAYAN DE ORO CITY – Prioridad sa gobyerno ang paghatag COVID-19 vaccines sa rehiyon 10 ilabina sa Cagayan de Oro ug Gingoog City sa bulan sa Hulyo ug Agosto.
Miingon si Philippine Vaccine Czar Carlito Galvez Jr. nga kinahanglang mapaspasan ang pagpamakuna sa rehiyon aron masanta ang posibleng pagkuyanap sa delta variant sa COVID-19.
Gipasalig ni Galvez nga ilang suportahan ang ‘daily vaccination capacity’ sa Cagayan de Oro ug Gingoog City.
Samtang mihatag katin-awan si Galvez kon nganong wala ipaubos sa enhanced community quarantine o ECQ ang Misamis Oriental ug gipunting lang sa Cagayan de Oro ug Gingoog City.
Miingon si Galvez nga palisiya sa IATF nga ‘calibrated’ ang pag-imposar sa ‘quarantine restrictions’ ilabina sa mga lugar nga apektado sa COVID-19 delta variant.
Gibutyag niini nga mosamot lamang ang problema kon ipaubos sa ECQ ang mga lugar nga minus ang kaso sa virus infections.
