CAGAYAN DE ORO CITY-Dili makasupak sa election laws ang mga kandidato bisan kon sila i-indorso pa sa gobernador o
mayor sa brgy ug SK elections sa Mayo 14 ning tuiga.
Kini bisan nga tataw sa balaod nga non-partisan ang himoon nga piliay sa barangay ug Sangguniang Kabataan o SK.
Miingon si Comission on Elections o Comelec regional director Reynato Magbutay nga katungod sa gobernador o mayor nga mopabati sa kaugalingong opinyon kabahin sa mga kandidato nga gusto niya hatagan sa iyang suporta.
Giklaro ni Magbutay nga mahimo lamang kini illegal kon mismo ang barangay o SK candidates ang mogamit sa
political party ug modawat sa donasyon gikan sa elected officials sa lalawigan,munisipyo ug syudad.
Samtang ipagawas sa dili madugay sa Commission on Elections o Comelec ang listahan sa mga lugar nga init ang bangi sa politika tali sa mga kandidato sa brgy ug SK elections dinhi sa rehiyon.
Kini kon subli magtagbo ang naglangkob sa Comelec-PNP-AFP regional joint security coordination center alayon sa Mayo 14 nga piliay.
Miingon si Magbutay nga gitahasan na nila ang PNP ug AFP aron makakuha’g lista sa mga lugar nga makonsiderar nga area of immediate concerns.
Kini aron mahatagan sa prioridad sa seguridad ilabina nga anaa sa taas nga bahad sa terorismo ang Mindanao aron gipaubos sa martial law.
Samtang mag-atubang sa mas bug-at nga kaso kadtong mga tawo nga masikop kay magdala-dala’g armas mismo sulod sa election period alayon sa piliay sa brgy ug SK sa Mayo ning tuiga.
Kini tungod kay kasupakan sa election gun ban ug dili illegal possession of firearms ang ikaso batok sa mga
makasupak niini.
Miingon si PNP regional spokesperson Supt Lemuel Gonda nga dako’g ikatabang ang gipatuman nga martial law aron epektibo mapatuman ang election laws sulod sa gisitar gikan Abril 14 hangtod May 21 ning tuiga.
Mosugod ang pagduso sa sertipiko de kandidatura sa petsa 14 ngadto 21 sa Abril ning tuiga.
Sugdan usab ang campaign period sa Mayo 4 hangtod 13 sa kasamtangang tuig.
