CAGAYAN DE ORO CITY – Gihupay ni Dept of Health Sec Francisco Duque ang kabalaka sa publiko nga ‘local mutation’ o may kaugalingon nang COVID-19 delta variant nga unang miigo sa 11 ka residente dinhi sa nasud.
Kini human kabahin ang 11 ka delta variant carriers sa 35 ka kaso nga gikompirmar sa Philippine Genome Center nga nag-eksamin sa specimen sa mga pasyente nga positibo bayrus.
Gihimo sa kalihim ang katin-awan dungan sa pagbisita sa Coordinated Operations to Defeat Epidemic Team nga nakigtagbo kanila ni City Mayor Oscar Moreno ug Gingoog City Mayor Eric Cañosa kinsa pulos naka-enhanced community quarantine ang gidumala nila nga dakbayan kagahapon sa buntag.
Samtang wala tagu-i sa IATF pagkasudli sa Pilipinas sa COVID-19 delta variant nga dunay 35 ka tawo na ang kompirmadong natakdan ug duha kanila ang nangamatay na.
Depensa kini ni Duque kon nganong dugay napagawas ang impormasyon sa delta variant cases nga Hunyo pa nagsugod nga nasudlan ang nasud.
Miingon si Duque nga wala sa ilang kontrol ang resulta sa Philippine Genome Center nga maoy naka-detect nga may mga pasyente na nga nagka-delta variant.
Samtang dili pa angayang dali-dalion ang pagwagtang sa enhanced community quarantine restrictions nga gipatuman sa syudad ug Gingoog City.
Kini bisan kon gikompirmar sa IATF nga pulos na naulian ang 33 ka pasyente nga natakbuyan sa COVID-19 delta variant nga naglakip sa unom niini gikan sa maong mga syudad.
Miingon si DoH 10 Director Dr Jose Llacuna nga mohimo pa sila sa close contact tracing aron pagsiguro nga wala kini makatakod sa laing mga kabanay.
Una na nang ubos sa ECQ ang duha ka syudad sa kabalaka nga mahitabo ang variant surge sama sa India ug Indonesia.
Samtang gihagit ni Philippine Vaccine Czar Galvez nga paspasan pa ni Moreno ang vaccination rollout alang sa tanang sektor nga gitugot na sa IATF guidelines nga bakunahan ning syudad.
Kini kon gusto sa city govt nga makab-ot ang ‘herd immunity’ o general public protection nga anaa sa 70 porsiento pag-abot sa Oktubre o Nobyembre ning tuiga.
Miingon si Galvez nga sa 5-mil ka indibidwal nga mabakunahan kada-adlaw,siguradong makab-ot sa dakbayan ang proteksyon alang sa katawhan.
