CAGAYAN DE ORO CITY – Gitahasan ni Police Regional Office 10 Director Brig Gen Jaysen De Guzman ang command group padulong lower units nga kanunay’ng e-prioridad ang paghatag proteksyon sa katawhan sa Northern Mindanao region.
Kini kung gusto sa PRO 10 nga mahuptan ang padayong pag-ubos sa ihap sa kreminalidad partikular ang gitawag nga 8 focus crimes nga dako’g epekto sa katilingban kung masagdan.
Gihimo ni De Guzman ang mensahe nunot sa paghupot sa rehiyon sa pag-ubos sa focus crimes sa 10.12 porsiento diin dayag napamatud-an ang epektibo nga pagpatuman sa gipalig-ong law enforcement operations ug pakiglambigit sa katawhan sa katilingban.
Siya miingo nga subay sa 70-day comparative crime statistics report, mikanaug sa 302 ka 8 focus crime incidents gikan sa 336 sa Nobyembre 3,2024 hangtod Enero 11,2025 hangtod Enero 12 hangtod Marso 22, 2025.
Midugang ang heneral nga tungod niini,pabiling pursigido ang PRO 10 sa pagtuman sa tahas nga ipatuman ang balaod pagsiguro nga luwas puy-an,trabahuan ug bisan pag-negosyo ang Northern Mindanao.
