CAGAYAN DE ORO CITY – Giakusahan sa ilado nga abogado nga si Atty Alejandro Jose Pallugna si Regional State Prosecutor Merlynn Uy nga dunay personal nga kasuko kaniya.
Kini human gibulgar ni Uy nga nakonbikto sa kasong obstruction of justice si Pallugna tungod sa pagtago sa menor de edad nga testigo sa iyang langyaw’ng kliyente sa syudad kaniadto.
Miingon si Pallugna nga dili unta kini angay buhaton ni Uy ilabina nga wala pa’y final ruling niini ang korte batok sa maong kaso.
Si Pallugna ang gikonbikto ni RTC Branch 38 Judge Emmanuel Pasal ug gimanduan magbayad lamang sa 6-mil pesos nga monetary penalty inay prisuhon sulod sa unom ka tuig.
Samtang gihimakak ni Uy nga pagguba sa pagkatawo ni Pallugna ang pagsulti niini kabahin sa iyang pagka-konbikto sa kasong obstruction of justice sa korte sa syudad.
Miingon si Uy nga walay basehan ang pasangil ni Pallugna kaniya ilabina nga wala siya’y kalabutan sa maong kaso.
Dugang ni Uy nga unang gikasuhan sa complainant si Pallugna sa kidnapping ug obstruction of justice apan usa lamang sa mga sumbong ang dunay napakanaug nga hukom gikan sa korte ning semanaha.
