CAGAYAN DE ORO CITY – Nagkabinugkusay sa ilang mga puwersa sila si Police Regional Office 10 Director Brig.Gen Rolindo Suguilon ug Philippine Drug Enforcement Agency 10 Director Alex Tablate alang sa gipalig-ong kampanya kontra kreminalidad nga adunay dakong kalambigitan sa illegal nga droga.
Kini ang sentro sa hisgutanan ug nauyunan sa duha ka top officials sa maong mga ahensiya nga adunay tahas nga buntugon ang kaylap nga presensiya sa illegal nga droga sa Northern Mindanao region.
Gihimo ang panag-uyon sa duruha dihang gibisita ni Tablate si Suguilon sa PRO 10 headquarters nga nakabase sa Kampo Alagar alayon sa maong katuyuan ning syudad.
Nasayod ang duruha sa tagsa-tagsa ka importanteng papel sa PNP ug PDEA nga pulos gisangunan sa nasudnong-gobierno nga puuhon ang suliran sa droga sa Pilipinas.
Dumduman nga dugay’ng panahon nga adunay lig-ong kolaborasyon ang PDEA ug PNP pag-abot sa isyu sa kampanya kontra illegal nga droga sa nasud.
Hisayrang giila sa PDEA nga dakong tabang ang pag-abag sa PNP sa mga kampanya sanglit limitado lang ang ilang puwersa nga naglihok sa 18 ka rehiyon sa Pilipinas.
