CAGAYAN DE ORO CITY – Gimando ni Police Regional Office o PRO-10 Director Brig Gen Rafael Santiago Jr sa tanang commanders nga walay pag-relax sa ilang pagbantay sa ikaupat nga State of the Nation Address o SONA ni Pres Rodrigo Duterte sunod semana.
Kini sa tuyo nga dili makapanghasi ang bisan kinsa nga grupo nga naglaraw pagsabwag kagubot samtang babaton ni Duterte ang SONA.
Namahayag si PRO-10 spokesperson Police Lt Col Mardi Hortillosa nga gawas sa security implementation plan sa Camp Alagar,gitahasan usab ang ground commanders sa paghimo’g kaugalingong security measures.
Katuyuan niini nga mahatagan sa seguridad ang bisan unsa nga kalihukan ilabina kon dunay mga progresibong pundok nga mohimo’g lihok-protesta kontra SONA ni Duterte.
Samtang gipadumduman sa 4th ID,Philippine Army ang mga progresibong pundok nga mohimo’g lihok-protesta sa ika-upat nga SONA ni Duterte nga dili i-uban ang kabataan.
Gihimo ni 403rd IB,Philippine Army commander Brig Gen Edgardo de Leon ang pahayag aron dili na masubli ang sitwasyon sa grupo sa mga mag-uuma naharang gikan sa Bukidnon pasulod sa syudad aron mohimo’g lihok-protesta batok gobierno sa miaging mga bulan.
Namahayag si De Leon nga wala kaayo sila’y angay bantayan kay sa kauluhan ang SONA ni Duterte apan alerto gihapon kini sa mga kalihukan sa CPP-NPA.
