CAGAYAN DE ORO CITY-Naka-full alert status ang kapolisan ug militar sa pagpatuman sa seguridad sa rehiyon ning semanaha.Kini human subli naigo sa pagpamomba ang usa ka mall diin duha ka tawo ang namatay samtang daghan ang samaron sa Cotabato City kagahapon sa hapon.
Miingon si Cagayan de Oro City Police Office o COCPO spokesperson Police Supt Mardi Hortillosa nga bisan wala pa nahitabo ang pagpamomba,daan nang naka-taas ang alerto tungod sa bahad sa mga terorista nga hasion ang katawhan sa syudad.
Gihangyo usab ni Hortillosa ang publiko nga kanunay ang paghatag kooperasyon sa security measures aron dili malutsan sa mga terorista ang syudad.
Samtang pabilin ang pag-abag sa 4th ID,Philippine Army sa kapolisan sa pagmintinar sa kahusay’g kalinaw sa syudad
ug ubang bahin sa Northern Mindanao.
Miingon si 4th ID commander Maj Gen Ronald Villanueva nga napasayon ang paghatag seguridad sa syudad tungod sa positibo nga pagtubag sa publiko pag-abot sa hadla sa terorismo.
Dugang ni Villanueva nga kuyog ang PNP,kanunay nga andam ang militar pag- depensa aron luwas sa bisan unsa nga klase sa bahad ang katawhan sa rehiyon.
Samtang giawhag ni Regional Peace and Order Council chairman City Mayor Oscar Moreno ang publiko nga suportahan
ang militar ug kapolisan sa gipatuman nga hugot nga seguridad sa rehiyon.
Gihimo ni Moreno ang apelar tungod sa laing pagpamomba diin duha ka tawo ang namatay samtang kapi’g 30 ang samaron
sa Cotabato City kagahapong adlawa.
Miingon si Moreno nga angay sabton sa publiko ang security plan sa kapolisan ug militar kay gitumong kini aron kapanalipdan ang mga kinabuhi nga target isabotahe sa mga teroristang pundok nga naglihok sa Mindanao.
