CAGAYAN DE ORO CITY – Gusto ipa-rebyo sa komitiba sa trade and commerce sa konseho ang gi-aprobahan nga usbaw-suhulan sa RTWPB -10 nga unang gipangayo sa ALU-TUCP alang sa mga mamumuo nga nakabase dinhi sa Northern Mindanao.
Miingon si Kag George Goking,chairman sa komitiba nga may nakita siya nga angayang klaruhon sa panig sa gobierno kabahin sa 40 ug 47 pesos nga umento sa inadlaw’ng kinitaan sa agriculture ug non-agriculture sector.
Giangkon ni Goking kinsa usa usab gihapon na ka negosyante ning syudad, nga ubos ra ang gihatag nga umento sa suhulan alang sa mga pribadong trabahante dinhi sa rehiyon.
Mo-epekto ang unang tranche nga 25 pesos sa Hunyo 18 ug sundan kini sa sa Disyembre 16 ning tuiga.Samtang namugos ang hugpong sa mga negosyante nga igo na ang ilang nahatag nga dugang suhulan sa mga trabahante dinhi sa rehiyon.
Kini ang tubag ni Antonio Uy,presidente sa Misamis Oriental Filipino-Chinese Chamber of Commerce Incorporated kabahin sa laraw nga ipaubos sa rebyo ang aprobadong wage increase ilabina dinhi sa syudad.
Namahayag si Uy nga 20 hangtod 30 pesos lamang unta ang ilang kaya mahatag apan gipun-an pa kini sa gobierno aron makab-ot ang maong kantidad sa usbaw.
Gani,pipila sa ilang mga kaubang negosyante ang mangayo’g exemption nga dili maapil sa maong obligasyon kay wala sila’y kapas pagbayad niini ngadto sa mga mamumu-o.
