CAGAYAN DE ORO CITY – Gipaubos na ni Pres Rodrigo Duterte sa state of calamity ang Northern Mindanao kuyog ang ubang Visayas -Mindanao regions nga grabeng apektado sa bagyong Odette.
Kini tungod sa kadaot nga gibilin nga naglakip sa gatusang kinabuhi nga nakalas,daghang missing ug kalisod sa katawhan sa mga rehiyon nga naigo sa bagyo.
Gibutyag ni Duterte nga sulod ning semanaha,madawat na sa matag-LGU ang mga pasiunang tabang-pinansyal gikan sa nasudnong gobierno.
Sulod sa rehiyon,dunay 7 ka tawo ang patay tungod sa epekto sa bagyo sa miaging semana.
Samtang nakatala na sa inisyal nga halos 30 milyon pesos nga damyos ang Dept of Agriculture o DA 10 sa sektor sa agrikultura nunot sa bagyong Odette dinhi sa rehiyon.
Kini subay sa nadawat nga damage report ni DA 10 regional director Carlene Collado gikan sa pipila ka lugar sa Misamis Oriental,Lanao del Norte,Misamis Occidental,Bukidnon ug Camiguin.
Gibutyag ni Collado nga lauman nila ang pagsaka sa damyos kay may local govt units pa nga dili kumpleto sa ilang nasubmitar nga damage assessment sukad nag-agi ang bagyong Odette sa rehiyon.
