CAGAYAN DE ORO CITY – Nangayo’g tabang pinaagi sa Bombo Radyo si Tulunan,North Cobabato Mayor Reuel Limbungan sa ayuda alang sa iyang apektadong katawhan sa 6.6 magnitude nga linog.
Kini human daghan sa ilang katawhan ilabina sa brgy sa Paraiso,Bagdok ug Daig ang nawad-an sa pinuy-anan ug nangaguba usab ang mga tunghaan ug ubang kagamitan sa gobierno gumikan sa linog.
Miingon si Limbungan nga hinoon usa lamang ka residente ang nakalas sa linog apan anaa sa 32 ang samaron ug kapin libo ka pinuy-anan ang nangaguba sa trahedya.
Dugang sa opisyal nga anaa sa 400 milyones pesos ang inisyal nga damyos sa maong linog.
Samtang gikompirmar sa City Disaster Risk Reduction and Management Dept o CDRRMD nga may kadaut sa mga gambalay sa sunod-sunod nga linog nga mitay-og sa syudad.
Kini alayon an sa 6.6 magnitude nga linog nga miigo sa Tulunan, North Cotabato diin nakasinati sa intensity 4 ang syudad.
Miingon si CDRRMD head Nick Jabagat nga mosubmitar sila’g report kang City Mayor Oscar Moreno kuyog ang Office of the Building Official ug City Engineering Office human ang mga pagtay-og sa duha ka pampublikong ospital, mga bangko, hotels, tulay ug mga tunghaan aron masuta kon adunay mga liki sa ilang istruktura.
Gani, tungod sa kusog nga impact sa linog napugos nga magsira ang Centrio-Ayala Mall human daghang mga bildo ug tiles ang nangabuak sulod sa opisina sa Teleperformance nga sakop sa maong establisimiyento.
Misaka usab sa lima ka tawo ang nadala sa ospital human makuyapan sa linog kagahapon sa buntag.
Samtang walay bisan unsa nga natala nga kadaot ang pagtay-og sa linog sa Tulunan,North Cotabato sa kalungsuran sa Misamis Oriental.
Kini human nabati usab sa lalawigan ang dili tanto kusog nga intensity sa linog diin nagresulta sa kanselasyon sa klase sa mga tunghaan kagahapon sa buntag.
Miingon si Provincial Disaster Risk and Reduction Management Office o PDRRMO head Vincent Jun Dy nga wala kaayo maapektuhi ang lalawigan sa tulo ka sunod-sunod nga pagtay-og.
Gani, nanawagan siya sa mga magtutudlo ug mga ginikanan nga i-resume ang pagbukas sa klase kon magpabilin gihapon nga luwas ang lalawigan batok sa hinay nga earthquake aftershocks.
